Veka som gjekk (utanfor Sandeid)

Jo, eg har prøvd. Og eg har fått mange velmeinte tips og råd. ”Du er nøydd å lese Snømannen! Eg greidde ikkje å legge ho frå meg”, har dei sagt. Eg lytta til tipset, og leste vel 300 av dei drygt 400 sidene. Eg hadde ikkje noko som helst problem med å legge ho ifrå meg. Korleis historia enda, har eg inga aning om.

”Du må lese Lars Kepler. Eg fekk ikkje sove etter å ha lest Hypnotisøren”, fekk eg tips om. Eg las, og det var tvert imot. Eg sovna som eit barn etter berre nokre sider. Om det er eg som er lat, kresen eller berre tett i pappen, det skal eg ikkje spekulere i, men det er underleg. Eg har mange gonger sete på venterom og lest om dronning Sonja sin sommargarderobe, om Martin Schanche sine evner på kjøkkenet, eller om nye Saab-modellar frå 1995. Har nauda vore stor nok, har eg lest bruksanvisningar på jordbruksutstyr. Frå perm til perm. Nei, kresen er eg nok ikkje.

Eg klarte også å kome meg gjennom eit ganske så tungt pensum i studietida, og 600 sider om etikk i media krev ein viss stamina, så eg vil påstå at mitt lunkne forhold til romanar ikkje er eit resultat av latskap heller. Dermed er det vel berre ei forklaring igjen.

Å lese nyheiter er i alle fall både underhaldande og opplysande, og også denne veka har det skjedd ting ute i verda. Her er eit par saker eg la merke til.

* Os- og fusaposten er ei avis eg les kvar veke, men denne veka var det ikkje dei redaksjonelle artiklane eg beit meg merke i. Det var derimot ein annonse for partiet Høgre som fanga merksemda mi. Ved sidan av biletet av ei smilande Erna Solberg, sto det ”Vil du ha ein statsministar frå vestlandet? Då må du stemme Høgre.” Min første tanke var denne: Vil du basere din stemme på kor statsministarkandidaten har vakse opp, så bør du ikkje stemme i det heile tatt.

* Ein stortingskandidat frå Framstegspartiet blei i 2018 fråteke verv i partiet då det blei avslørt at han hadde innleia eit forhold til ei ung kvinne i partiet. I løpet av 2019 og 2020 skal det ha kome to nye varsel mot mannen, etter at han skal ha sendt penisbilete til yngre kvinner i partiet. Partileiar Sylvi Listhaug vil ikkje kommentere saka, men eg mistenker at mannen berre har misforstått rolla si ein smule. Slagordet ”For folk flest” handlar så vidt eg veit ikkje om eksponering av eigne forplantningsorgan.

* VG skriv denne veka at rapparen Kanye West fekk bygd ein fullskala replika av barndomsheimen sin midt på konsertarenaen der han skulle opptre for omlag 40 000 tilskodarar nyleg. I løpet av konserten skal byggverket ha blitt eit dramatisk midtpunkt då dansarar utkledd som politistyrkar sirkla rundt huset. For å runde av showet skal West ha tent fyr på seg sjølv og etterlikna sine eigne bryllaupsløfter til Kim Kardashian. Om han spelte noko musikk, står det ingenting om.

* Ei fersk undersøking viser at kvar tredje 14-åring i Norge får meir enn 40 000 kroner i konfirmasjonsgåver, og at mange kommande konfirmantar gruar seg, fordi dei ikkje veit om dei får like mykje pengar som venene sine. Det er tøff lesing når 20-åringen Sofie fortel Tv2 om marerittet ho sjølv var gjennom som konfirmant, og berre fekk bunad og pengar i sparefond. Likevel har ho kome styrka ut av den tøffe tida, og ho går i dag så langt som å seie at ho er takknemlig for gåvene ho fekk. Det synst eg er stort av ho.