Veka som gjekk (utanfor Sandeid)
Det har vore ein velsigna flott sommar. Ikkje sidan 1997 har vi hatt sommarmånader med ein slik varme, så mange solskinsdagar, spirande blomar, herlege badetemperaturar og fluger. Dei hersens små, summande verkebyllane. Dei eig ikkje empati eller folkeskikk, og tar ikkje eit snev av omsyn til ein stakkar som allereie har ei kort lunte.
Eg kunne fint ha levd med ei fluge på soverommet. Problemet er berre at dei små jævlane aldri nøyer seg med å vere til stades i rommet. Dei må på død og liv gjere seg til kjenne eit par centimeter frå nasen min, berre for å helle bensin på bålet som er i ferd med å bli tent opp i kvar celle i meg, der eg ligg i mørket. Så tar dei med høg presisjon ei kontrollert landing på øyret mitt. Kva er det då dei forventar skal skje?
Eg finn meg sjølvsagt ikkje i dette, og då er einaste utveg å hente ”tennisracketen” med straum. Den er ein god ven å ha, og den blir brukt mykje. Ein ettermiddag gjekk det imidlertid ikkje som planlagt. Etter ei flugejakt som hadde gått over fleire minutt, gjennom fleire rom, trefte eg endeleg blink, og ei svart, velfødd husfluge ramla livlaus til golvet. For å markere at eg hadde sigra over ondskapen, fekk eg det for meg å halde straumracketen som ein gitar, og ”spele” ein trudelutt i sigersrusen. Eg hadde imidlertid framleis fingeren på straumknappen, med det resultat at eg fekk straum i meg, og skvatt så racketen fauk i veggen og blei øydelagt. Flugene vann slaget den dagen, men krigen held fram.
Annonse
Ute i verda har det skjedd ting, også denne veka.
* Dagbladet skriv denne veka at franske forskarar har gjort oppsiktsvekkande funn etter testing av dopapir. Billeg og dyrt papir har vore gjennom ei rekke testar, der mjukheit, oppløysingstid og penetrasjonsmotstand er nokre av dei viktigaste. Det blir opplyst at det dårlegaste dopapiret kun tålte simulert fingermotstand på 2,1 newton, medan dei beste tålte over 4,5 newton. Den store overraskinga i testen var at eittlags papir løyste seg saktare opp i vatn enn dyrare to- og trelags papir, og tettar dermed røyra lettare. Greitt å vite.
* Kristeleg Folkeparti gjorde eit katastrofalt stortingsval, og hamna godt under sperregrensa. Ekspertar VG har snakka med, meiner det vil bli vanskeleg for partiet å kome tilbake til det gode selskap i politikken. Det er godt dei framleis har trua og håpet.
* 20-åringen Pia Olden tirra på seg eit samla hylekor då ho for to år sidan gjorde det kjend at ho hadde valt å ete hesten sin Drifting Speed, då den måtte avlivast. No står ho fram på NRK, med planar om å starte rideskule. Jepp. Rideskule.
Annonse
* Ekstremvêr kostar USA meir enn 860 milliardar kroner i 2021, ifølge president Joe Biden. Presidenten peikar vidare på menneskeleg aktivitet som årsaka til klimaendringane som skapar det øydeleggande været. Hadde berre amerikanarane haldt seg til Donald Trump, så hadde dei pengane vore spart. Då hadde verken klimaendringar eller ekstremvêr eksistert.
