Veka som gjekk (utanfor Sandeid)

Desse bonus-fridagane er som vakre små oasar i ein kvardag der dagane ofte blir like, med arbeid, middag, fotballtreningar, oppvask, rydding og handling av mat. Eg set sjølvsagt pris på kvardagen også, men det er ikkje til å legge skjul på at desse herlege fredagane er velkomne når dei kjem.

Som sagt har eg fri denne fredagen, og det er så mykje eg kunne ha gjort. Eg kunne ha lagd meg ein herleg frukost, sett på ein spanande serie på tv eller kanskje putla litt i båten? Bakt kanelsnurrar? Mulegheitene er uendelege, men ingenting av dette blir det noko av. Eg har nemleg fått beskjed av min betre halvdel at på fredag, då er planane lagt.

Vi skal handle julegåver. Og vi skal kose oss.

Det fins faktisk menneske i denne verda som skildrar ei 84-punkts handleliste som sjølve oppskrifta på kos. Som med glede og pågangsmot brøytar seg rundt i parkeringshus, handlegater og kjøpesenter mellom andre målretta kundar med brutale julegåvelister. Som kan sitte på ein kjøpesenterkafé med 18 handleposar under bordet, skrikande ungar på nabobordet og ein lunka kaffekopp til 52 kronar i handa, og nyte livet. Eg er gift med eitt av desse menneska.

Kos. Det er det ho kallar det.

Løfter ein blikket, kan ein lett sjå sambuarane og ektefellene som er blitt dratt med på galskapen mot sin vilje. Dei er lett å kjenne igjen på den apatiske gangen. Armane som heng som kjettingar frå kroppen. Dei livlause auga. Resignasjonen har tatt dei.

Denne fredagen blir også eg ein av desse stakkarane, og det er ingenting eg kan gjere med. Eg fekk presentert utkastet til handlelista allereie på onsdag. Øvst på lista står det ”Kalendergåver”. Det blir 48 stykk. Takk for alt.

Eit par nyheiter har eg imidlertid fått med meg dei seinaste dagane, og her er nokre av dei:

* Fleire stortingspolitikarar krev no at stortingspresident Eva Kristin Hansen forklarar seg etter at det blei klart at ho har oppgitt ein hybel i Trondheim som bustadadresse, og fått dekt pendlarbustad i hovudstaden, trass i at ho har budd like utanfor Oslo med mannen sin sidan 2016. Hansen sjølv seier at ho har misforstått regelverket for pendlarbustadar, og det synst eg at ho må bli trudd på. Det er vel ikkje unaturleg å oppgi ein hybel i ein annan del av landet som bustadsadresse, sjølv om ein har budd i Oslo i årevis? Ein slik misforståing kan skje med kven som helst.

* Ei kvinne i byen Dunedin på New Zealand ringte politiet og fortalte at ho blei halde som gissel i sin eigen heim, skriv The Guardian denne veka. Kvinna fekk til slutt hjelp, og politiet fekk kontroll på gisseltakaren, som var ei sint pungrotte. Det er ikkje nemnt om politiet måtte forhandla for å få frigitt kvinna, men ifølge avisa enda det godt for alle partar.

* Skodespelaren Aksel Hennie slo seg i hovudet under ei filminnspeling for nokre veker sidan. Han slo seg så hardt at han fekk vondt og begynte å blø, og denne veka kan Dagbladet eksklusivt fortelle korleis Hennie har takla livet etter hendinga. Overskrifta er ”Åpner opp om tida etter ulykka”, og artikkelen byr på sterk lesing. Blant anna kjem det fram at Hennie var hos legen.

* Til slutt litt vitskap. Tidsskriftet Ear, Nose & Throat Journal (ja, det fins) har denne veka oppsiktsvekkande nyheiter å by på. Ein forskingsrapport laga av forskarar frå Tyskland og England konkluderer nemleg at sex kan kurere forkjølelse, tette nasar og sår hals betre enn for eksempel nasespray. Det er ikkje nemnt noko om korleis praktiske ting som legereseptar skal bli løyst, men eg antar at det blir mykje kjekkare å gå på apoteket i framtida.