Vil gjera Sauda blå-blå av omsyn til jentene

Eit einstemmig styre i Sauda idrettslag legg fram forslag for årsmøtet i februar om å endre klubbens offisielle draktfargar frå blå overdel og kvit shorts til blå overdel og blå shorts. Bakgrunnen for endringsforslaget er omsynet til kvinnehelse, og tilsvarande grep er gjort i ei rekke norske idrettsklubbar, som Klepp, Viking og Bryne. Styreleiar i Sauda idrettslag, Roger Birkeland, seier det er logisk å gjere ei slik endring.

– Dette er eit grep som vi ønsker å gjere først og fremst av omsyn til jentene i ballidretten, med tanke på utfordringar med kvite shortsar og menstruasjon. Det er eit lite kostbart og energikrevande grep, som eit samla styre ønsker å gjennomføre umiddelbart, seier Birkeland til Ryfylke.

– Unødvendig

Birkeland fortel vidare at sjølv om tiltaket først og fremst ivaretar eit omsyn til dei aktive jentene i idrettslaget, går styrets forslag ut på å endre klubbens offisielle draktfargar, også for gutar og herrar.

– Det er ein del klubbar som har innført liknande endringar bare på kvinnesida, men for oss er det naturleg at alle stiller seg bak dei same fargane, som klubb. Det er det rette for oss, seier han.

Kvinnehelse har eit tydelegare fokus i idretten enn for berre få år sidan, og dette skildrar Birkeland som positivt, både for dei som driv idrett i dag og dei jentene som vurderer å starte med, eller gå tilbake til, ballidretten.

– Det er jo både trasig og unødvendig at noko så naturleg som menstruasjon skal gjere at nokon vel å halde seg utanfor. Eg trur denne endringa kan virke førebyggande mot fråfall i ballidretten i Sauda, og kanskje til og med gjere det lettare for nokon å bli med, avsluttar han.

Saka blir avgjort av idrettslagets årsmøte 22. februar.