Vil halde minigolfbanen open så lenge det er praktisk muleg

Minigolfbanen ved Andedammen opna med brask og bram i sommar og mange har benytta seg av det nye aktivitetstilbodet. Men utgangspunktet var at anlegget skulle halde stengt frå hausten og gjennom vinteren. Nå vurderer Sauda Minigolf om dei skal forlenge sesongen ut over det som opprinneleg var planlagt.

– Me driftar banen på dugnad nå. Dersom det er interesse for at me held banen open på dagtid vidare, så må me få til ei dugnadsløysing for å få dette til. Etter vindkast tar det halvannan time å fjerne alt lauvet på banen. Det er litt arbeid å halde banen i drift, seier Nils Jarle Sandanger i Sauda Minigolf.

Mellom klokka 10 og 12 i dag, onsdag, vil banen vere open.

– Da vil me også lodde stemninga om vidare drift og korleis me skal organisere det. Alle som ønsker å spele litt minigolf på dagtid framover må gjerne møte opp i dag, seier Sandanger.

Han opplyser at minigolfbanen ikkje bare er ein aktivitet, men også ein sosial møtestad.

Det er dei frivillige eldsjelene i Andedammens Venner som står bak etableringa av minigolfbanen og som driftar den nå på dugnad.