Vilde (24) frå Sauda til topps i frikjøringskonkurranse i Vågå

24 år gamle Vilde Bergstuen frå Sauda gjekk laurdag heilt til topps i det prestisjefylte frikjøringsrennet Høkkers Invitational i Vågå I Gudbrandsdalen.

For å vera med i rennet, som i år blei arrangert for åttande gong, må ein vera invitert.

– Høkkers er ein konkurranse utanfor norgescupen, der arrangøren bare inviterer utøvarar dei meiner er gode nok. Og så er det store pengepremiar, opplyser Bergstuen over telefon.

– Korleis er det å gå heilt til topps i ein konkurranse med bare gode skikjørarar?

– Veldig gøy! Særleg fordi deltakinga var så god. Arrangøren har verkeleg jobba for å få med mange jenter denne gongen, rosar Bergstuen.

Konkurransen hadde først ein kvalifiseringsrunde, før dei beste møttest til finale.

– Og etterpå var det premieutdeling og fest, fortel ho vidare.

Usikker på BCC

Til dagleg bur 24-åringen i Stockholm, der ho studerer til å bli naprapat. Reisa til Vågå innebar ein ti timar lang biltur – kvar veg.

– Konkurransen var den første for året for min del, seier Bergstuen, og legg til at ho prøver å vera så aktiv på frikjøringsfronten som det lar seg gjera med omsyn til avstand og studiar.

– Om to veker er det Sauda BCC, stiller du der?

– Eg planlegg å få med meg norgescupfinalen i Røldal Freeride Challenge, men BCCen kolliderer dessverre med eksamen…

Litt seinare i samtalen opplyser ho at ho likevel held døra litt på gløtt for å konkurrera på heimebane i midten av april.

– Eg er i dialog med skulen, opplyser Bergstuen.

50 000 kroner

Førstepremien i Høkkers gav Vilde Bergstuen 50 000 kroner i premie.

– Eg har planar om å ta eit friår neste år der eg reiser rundt og står på ski. Då kjem premiepengane frå helga godt med, slår ho fornøgd fast.

I rennet var det også lagt inn ein konkurranse i beste triks». Her gjekk Klara Håvarstein frå Randaberg, tidlegare elev ved Ski-og snowboardlinja ved Sauda vidaregåande skule, til topps, og kunne innkassera premien på 10 000 kroner. Håvarstein enda på tiandeplass i hovudkonkurransen.