Bjørn Eidsvåg opnar ballet i Hver gang vi møtes»

1. nyttårsdag sender TV2 det første programmet i den nye sesongen av Hver gang vi møtes». I hovudrolla står ein av Saudas store søner, Bjørn Eidsvåg.

– Eg har blitt spurt om å vera med alle gongane. Eg har imidlertid vegra meg og tenkt at eg ikkje er skapt for å reisa på leirskule» med folk eg i utgangspunktet ikkje kjenner. Men så fekk eg høyra frå yngre folk at det var nettopp Hver gang vi møtes» eg burde delta i viss eg ville nå fram til deira generasjon med musikken min. Og då gjekk det opp for meg at det finst ein heil generasjon som har vakse opp etter at det meste av musikken min er laga. Eg landa på at det bare var å hoppa i det, fortel ein opplagt Eidsvåg i telefonen på veg til hytta bittelille julaftan.

Sju artistar

Årets sesong, som er den 13. i rekka, blei spelt inn på Kjerringøy utanfor Bodø i slutten av august og starten av september. Utanom Bjørn Eidsvåg deltar i denne sesongen Emma Steinbakken, Freddy Kalas, Isah, Karoline Krüger, Ingebjørg Bratland og Kristian Kristensen.

Programkonseptet går mellom anna ut på at dei øvrige artistane syng låtar frå personen som har hovudrolla i den einskilde episoden. Først ut er altså Eidsvåg.

– Blei rørt

– Eg har høyrt mange låtane mine framført av andre tidlegare, med veldig forskjellig uttrykk og kvalitet. Uansett er det er sjarmerande og fint at andre vil gi seg i kast med det eg har laga. Denne gongen var det dyktige kollegaer som skulle synga låtane, så eg var trygg på at dette ville bli bra, seier Eidsvåg.

Han var likevel ikkje heilt førebudd på det som venta under innspelinga.

– Eg blei overraska over inntrykka. Og rørt.

– Såpass at det blei grining? Det er ikkje heilt uvanleg at det skjer i Hver gang vi møtes»…

– Ja, det blei det. Ikkje hulkegrining, men eg måtte tørka tårer. Det er umuleg å ikkje bli rørt for eksempel når Kristian Kristensen framfører Eg ser» etter å ha fortald om hendingane på London Pub i Oslo i juni, der han var til stades, og om måten denne låten blei brukt til trøyst, fortel han vidare.

– Og så har Emma Steinbakken laga ein ny versjon av Floden», som eg er sikker på vil treffa eit yngre publikum, seier Eidsvåg engasjert.

Youtube-videoen av Steinbakken som framfører Eidsvåg&Nikolaisen-klassikaren blei slept 20. desember. Eitt døgn seinare var videoen strøyma meir enn 12 000 gonger.

Under innspelinga måtte naturlegvis Eidsvåg også framføra låtar frå dei andre seks artistane.

– Det har vore kjekt. Eg har jobba mye, øvd og halde på, og synest eg har fått det til, oppsummerer han.

Angrar ikkje

Etter vel gjennomført leirskuleopphald» konkluderer Eidsvåg med at det var verd umaken.

– Eg angrar ikkje i det heile tatt, slår han fast.

– Eg heldt på å gå på veggene til tider altså. Det blir veldig tett med 70 personar, som produksjonen tel, samla på ein liten stad.

Dei fleste av dei var relativt ukjende for Eidsvåg, men ikkje alle.

– Eg kjende Karoline og Ingebjørg godt frå før. Og hadde helst så vidt på Emma og Isah. Kristian kjende eg ikkje. Og ikkje Freddy Kalas, som jo driv i eit heilt anna segment enn meg. Men, altså, dæven, så kjekt det var, kjem det frå Eidsvåg, eldstemann i artistgjengen, på ein måte som gjer at det er tydeleg at han meiner det

Onsdag før jul var gjengen samla for ein liten reunion der dei også fekk sjå første episoden av den nye sesongen.

– Det var veldig hyggeleg. Ein får eit spesielt forhold til kvarandre under eit slikt opphold som me var på.

– Klarte æresborgar Eidsvåg å skvisa inn litt Sauda-reklame under innspelinga?

– Isah, som har vore i Sauda, lurte på korleis det var å veksa opp på ein så liten stad. Eg gav han klar beskjed om at han på ingen måte fekk lov til å dissa» Sauda. Men reklame… Sauda blir nemnt, og på ein positiv måte, trur eg, avrundar Bjørn Eidsvåg.