Fanden med forfall – Pakkers og Fyk speler til dans i Folkets Hus

Påsken 2023 var alt klappa og klart for påskedans til Siste dans på Folkets Hus», For livets glade gutter» og alle dei andre klassikarane til Vestlandsfanden. Onsdag kveld kom imidlertid meldinga kulturhusleiar Astrid Espeland ikkje ville ha. Det blir ikkje noko Fanden-show likevel.

– Vestlandsfanden har meldt sjukdomsforfall og kan ikkje spela i påska, opplyser Espeland.

– Me har måtta avlysa planlagde påskedansar to år grunna pandemien. Eg hadde slett ikkje lyst til å avlysa ein tredje, legg ho til.

Og påskedans på Folkets Hus blir det.

– Heldigvis har Pakkers vore så sporty å stilla på kort varsel, trass i eit allereie tett program, seier Espeland fornøgd.

Veteranar og ungdom

Bandet Pakkers frå Vindafjord platedebuterte med albumet Tviarbeid i 1998, då under namnet Matpackers. Sidan då har bandet reist land og strand og spelt på små og store scenar, og blir i dag rekna som eitt av landets fremste innan folkrock og roots-sjangeren.

Kveldens sidekick blir det unge Imsland-bandet Fyk, kjend for stor speleglede og energi, og med både coverlåtar og eigenprodusert musikk på menyen.

– Eg har ringt rundt til ein del av dei som har kjøpt billettar etter at det blei endring i programmet. Tilbakemeldingane eg har fått er positive. Eg trur dette kan bli ein knallkjekk kveld, seier kulturhusleiar Astrid Espeland.