Gir ein halv million kroner til tre idrettslag i Sauda

Sparebankstiftelsen SR-Bank har denne våren delt ut pengar til ei rekke idrettslag i Rogaland. Tre av idrettslaga held til i Sauda.

Sauda Turnforening får 50 000 kroner til å kjøpe inn nytt utstyr.

– Nå kan me fornye ein del av utstyrsparken. Det er viktig for barns fysiske helse, pluss at me også kan herje litt, smiler Mats Breivik i Sauda Turnforening.

Også Skyttarlaget fekk 12 500 kroner til å kjøpe inn utstyr.

– Me ønsker å kjøpe inn skyttarjakker til barn og unge, som dei kan låne. Godt utstyr er viktig, men det er kostbart. Derfor er me veldig takknemlege for at me får desse pengane, seier Solveig Steinsland i Sauda Skyttarlag.

Ny kunstgrasmatte

Den aller største tildelinga fekk Sauda idrettslag. Dei fekk 400 000 kroner som skal gå til ny kunstgrasmatte på stadionanlegget.

– Dagens kunstgrasmatte er i ferd med å gå ut på dato. Me har behov for å skifte den ut. Det har me tenkt å gjere i eit økonomisk samarbeid med Sauda kommune, som eig stadionanlegget, opplyser dagleg leiar i Sauda idrettslag, Kristoffer Birkeland.

At stiftelsar som Sparebankstiftelsen SR-Bank og Sparebankstiftelsen Sauda bidrar med store beløp, er Birkeland svært takknemleg for.

– Me har kostbare anlegg og planar om å bygge fleire anlegg. Me kunne ikkje gjort dette utan bidraga me får, blant anna frå sparebankstiftelsar.

Ønsker fleire søkarar

Vibece Herabakka i Sparebank 1 SR-Bank opplyser at Sparebankstiftelsen SR-Bank deler ut store beløp kvart år, og at dette skjer to gonger om året. Ho oppfordrar fleire til å levere inn gode søknader.

– Det er særleg tiltak retta mot barn og unge stiftelsen prioriterer. I tillegg er stiftelsen opptatt av at det går til eit bærekraftig tiltak som gir langvarig effekt, seier Herabakka.

Det var Leif Inge Løland i Tveit Regnskap som stod for overrekkinga.

– Tveit Regnskap er 51 prosent eigd av Sparebank 1 SR-Bank. Derfor er me ein liten representant for bankkonsernet ute i distriktet, opplyser Leif Inge Løland.