Julekonsert-sesongstart til helga

Sauda Song og Musikksamband har vedteke å halda julekonsert kvart år. Pengane som kjem inn vert delte ut til bygdefolk som treng det.»

Slik innleiar Ryfylke omtalen av julekonserten i 1951, der lokale kor og korps har gleda eit fullsett Folkets Hus. I dag, meir enn 70 år seinare, held det lokale musikkmiljøet framleis koken med julekonsertar til inntekt for sambygdingar som treng ei hjelpande hand før jul.

Søndag 4. desember står blandakoret Sonor som arrangør i 2022-versjonen av det som dei seinare åra har vore kjend som Frelsesarmeens julekonsert. Konsertstad er som vanleg dei siste åra Sauda kyrkje.

På programmet står kor-, korps- og trekkspelmusikk. Julekonsertens grand old man», 93 år gamle Thorbjørn Vang har planar om å vera med denne gongen óg.

Svaggane – endeleg

Tre dagar seinare, onsdag 7. desember, står Saudasvaggane med musikalske venner på scenen i Storesalen.

– Me er i rute! Alt var i grunnen klart i fjor, men så blei konserten koronaavlyst to dagar før, opplyser Odd Erik Egge, ei veke før konserten.

Saudasvaggane spelte sin første julekonsert for eit fullsett Folkets Hus i 2019. I 2020 blei det spelt fire konsertar med 50 publikummarar i kvar, grunna smittevernrestriksjonar.

– Me gler oss veldig til å spela for eit større publikum igjen. Det gir eit heilt anna oppleving, slår Egge fast.

I 2019 og 2020 stor vokalgruppa harmoni på scenen saman med Svaggane. Denne gongen er desse bytta ut med utflytta saudabu Helge Pedersen, Emma Bratland og Odd Atle Saltvik.

– For å laga ein litt annleis konsert, forklarer Egge.

Heilt annleis enn før blir konserten likevel ikkje.

– Det blir julemusikk og gjenhøyr med nokre av låtane frå sist. Og litt nytt stoff. Eg trur me har ein fin konsert å by på, og håpar folk har lyst til å komma og høyra på oss, avrundar Odd Erik Egge.

Dei andre Saudasvaggane er Magnar Birkeland, Oddvar Wiersen, Nils Kristen Herheim og Sindre Nordengen.

Soul og nostalgi

Sauda kyrkje er konsertarena når Britt Synnøve Johansen og musikar Idar Hauge gjestar Sauda tysdag 13. desember. Med seg får dei Sauda Soul Children/kids/teens i ein konsert der det blir lova gjenhøyr med kjende og kjære julesongar og garantert julestemning.

To dagar seinare inviterer Sauda kulturskule til Julenostalgi» i Storesalen i Folkets Hus og utstilling i Kraft kafe.

– Me ville gjerne ha eit tema for juleframsyninga vår og landa på at me hadde lyst til å ha julesongar som vekker nostalgikjensla, fortel rektor Eli-Jorun Tangeraas i kulturskulen.

– Denne kjensla blir jo vekka av ulike songar hos ulike menneske. Derfor er det både gamal og ny musikk med. Det er og ulike sjangrar på både dans og musikk. Framsyninga er ramma inn i forma av ein julekalender, der dei flinke kunstelevane våre har laga sjølve kalenderen. Mange av musikkinnslaga er henta frå ulike tv-julekalenderar, opplyser Tangeraas.

Julekonsertsesongen i Sauda blir avrunda tysdag 20. desember i Sauda kyrkje. Her inviterer Amelie og Erik Aldner, profesjonelle musikarar busett i Suldal, til julemagi i ei reise gjennom gamle og nye juleklassikarar, akkompagnert av piano og saksofon.