Kven fortener Eldsjelprisen?

Kvart år deler Sauda kommune ut Eldsjelprisen. Prisen går til enkeltpersonar, grupper eller lag som har gjort ein fortenestefull innsats gjennom frivillig arbeid i Sauda. Prisen er ein spesiallaga plakett og 10 000 kroner, og det er formannskapet i Sauda som bestemmer kven som skal få prisen.

Men før formannskapet skal bestemme kven som fortener prisen for 2022, ønsker dei forslag på gode kandidatar. Alle som ønsker å sende inn forslag på kandidatar må gjere dette innan 16. november. Sauda kommune ber også om at det blir sendt inn ei grunngjeving for kvifor du meiner din kandidat fortener prisen.

Fram til 2009 bar prisen namnet Kulturprisen, men blei da endra til Eldsjelprisen. Tidlegare vinnarar av Eldsjelprisen i Sauda er:

Tor Andreas Michalsen, Per Inge Fjellheim, Mental Helse Sauda, Oddvar Årthun, Sauda sanitetsforening og Saudasjøen sanitetsforening, Per Ellingsen, Interessegruppa Samuel Tveit, Kristoffer Nødland, ekteparet Odd og Solveig Wiik, Leif Gunnar Moe, Magne Bokn og Hans Søndenå.

Våren 2023 blir det opplyst kven som får Eldsjelprisen 2022, men den offisielle tildelinga har tradisjonelt skjedd på 17. mai.