Sauda kommune bruker meir på kultur enn dei fleste andre i Rogaland

Bare Suldal og dei tre minste kommunane i Rogaland brukte meir pengar per innbyggar på kultur i 2021, viser tal frå Statistisk sentralbyrå. I statistikken, som er basert på KOSTRA-tal, går det fram at Sauda kommune brukte 5 236 kroner per saudabu på kultur i fjor. Snittet for Rogaland er 3 100 kroner og landssnittet 2 895 kroner.

Spesielle forhold

Er det då slik at Sauda flottar seg på kulturfronten samanlikna med andre kommunar? Ikkje nødvendigvis. Bak tala ligg fakta som forklarer kvifor kommunen skil seg ut.

– Store delar av kostnadene går til drift av kommunale idrettsbygg og -anlegg, hovudsakleg Saudahallen, og til drift av Folkets Hus, forklarer kultursjef Åshild Marie Øverland.

Dei to postane gjer beslag på høvesvis 2 147 og 768 kroner per innbyggar, altså nær 3 000 kroner per hovud.

Øverland opplyser vidare at kostnadene til Folkets Hus for ein stor del handlar om husleiga dei betaler til eigaren av kulturhuset.

– Denne driftsmodellen gjer igjen at Sauda har langt lågare investeringskostnader i kultursektoren enn me ville hatt om kommunen eigde Folkets Hus. Og organiseringa av Folkets Hus som eit ideelt AS gir for øvrig kommunen langt lågare kostnader til kulturhus enn me elles ville hatt, legg ho til.

Godt fornøgde saudabuar

– Sauda bruker pengar på kultur og idrett. Som kultursjef er eg takksam for at både administrativ og politisk leiing ser idrett og kultur som viktig for at Sauda skal vera ein god stad å bu og besøka, seier Øverland.

I august presenterte Ryfylke tal frå Norsk Kulturindeks, som hadde undersøkt korleis innbyggarane såg på tilbodet i sin kommune.

– Resultata frå undersøkinga tyder på at me forvaltar pengane godt, for Sauda er jo den kommunen i Rogaland der folk er mest fornøgde med kulturtilbodet, avrundar kultursjef Åshild Marie Øverland.

Les også: Saudabuen mest fornøgd med kulturtilbodet

Netto driftsutgifter til kultur per innbyggar, utvalde kommunar, 2021: