Saudaungane les som aldri før

– Det er 218 ungar som har meldt seg på årets Sommarles-kampanje så langt, opplyser biblioteksjef Sveinung Helgesen fornøgd.

Dermed er det klart at 2022-rekorden på 202 deltakarar lokalt er slått – allereie dryge tre veker etter at årets kampanje starta opp.

Over 150 000 sider

I september 2022 skreiv Ryfylke om tredjeklassingen Nora som i løpet av dei tre sommarmånadene hadde lese heile 9 531 sider. Til saman hadde dei lokale Sommarles-deltakarane bokført 254 831 leste sider.

– Så langt i år er det registrert 1 870 bøker og 151 198 sider, fortel Helgesen.

Kampanjen held fram ut august. Dermed ligg dei leseglade saudaungane godt i rute til å knusa fjorårets rekordtal.

Når deltakarane rundar ulike milepålar, som å passera nivå med runde tal, vankar det premie frå biblioteket. Jo lenger opp i nivå ein kjem, jo vanskelegare blir det å stiga i gradene.

– Det var ein gut som sa at han måtte klara å nå nivå 50, for då kan han vinna fotballkort. Det er sikkert raskare måtar å skaffa seg fotballkort på, men eg har inntrykk av at det er stas når ein gjer seg fortent til premiane gjennom eigen innsats, seier Helgesen.

Starta i 2012

Sommarles starta som ein felles lesekampanje for Vestfold i 2012. Konseptet blei utvikla vidare ved å ta i bruk spel-element for å auka motivasjonen for lesing. Som i mange digitale spel, handlar Sommarles om å samla poeng, såkalla XP, ved å lesa bøker.

I 2021 deltok 164 000 norske barn i Sommarles.